మన పూర్వీకులు గ్రహాల అనుగ్రహము కోసము, ఆరోగ్యరీత్య స్త్రీ పురుషులు బంగారు నగలను ధరించెడివారు. వారము రోజులు అనగ ఆదివారము మెదలు శనివారము వరక్ రోజుకొక విధమైన బంగారు ఆభరణములను ధరించెడివారు. వీటినే ఏడు వారాల నగలు అందురు. గ్రహాలకు అనుకూలముగా కంఠహారములు, గాజులు, కమ్ములు, ముక్కుపుడకలు, పాపిటబిల్ల, దండెకడేము (వంకీ), ఉంగరాలు మొదలగు ఆభరణాలను ధరించెడివారు.

ఏ రోజున ఏయే నగలు ధరించవలెనో ఈ విధముగా తెలియజేయబడినది.
ఆదివారము: సూర్యుని కోసము కెంపుల కమ్మలు, హారాలు మొదలగునవి.
సోమవారము: చంద్రునికోసము ముత్యాలహారాలు, గాజులు మొదలగునవి.
మంగళవారము: కుజునికోసము పగడాల దండలు, ఉంగరాలు మొదలగునవి.
బుధవారము: బుధునికోసము పచ్చల పతకాలు, గాజులు మొదలగునవి.
గురువారము: బృహస్పతికోసము పుష్యరాగము కమ్ములు ఉంగరాలు మొదలగునవి
శుక్రవారము: శుక్రుని కోసము వజ్రాల హారాలు ముక్కుపుడక మొదలగునవి.
శనివారము: శనికోసము నీలమణి మణిహారాలు మొదలగునవి